Tuesday, 6 November 2012

အလံတော် အမှတ်တရ

       အခုတလော သတင်းတွေမှာ ခေတ်စားနေတာကတော့ ကြံ့ခိုင်ဖွံ့ဖြိုးရေးပါတီရဲ့ ညီလာခံဖွင့်ပွဲ အစ ကပွဲမှာ ထောင်ထားတဲ့ နိုင်ငံတော်အလံ ပြောင်းပြန်စောက်ထိုးဖြစ်နေတဲ့ အကြောင်းပါ။ သတင်း ဓါတ်ပုံတွေနဲ့မို့ ငြင်းရခက်တဲ့ ကိစ္စပါ။ အလံက အ၀ါ အစိမ်း အနီ အပေါ်ကနေအောက်ကို အစီအစဉ်အတိုင်းသွားရမှာကို အမှတ်တမဲ့ အနီ အစိမ်း အ၀ါ ဆိုပြီးတိုင်မှာ တပ်လွှင့်လိုက်တော့ ပြောင်းပြန်ကြီး ဖြစ်သွားရတာပေါ့။ မှတ်ချက်တွေ အမျိုးမျိုးပေးနေကြပါတယ်။ အဲဒီလို ဖြစ်တတ်တဲ့ သဘာဝကို ပြန်တွေးကြည့်ရင်း ကျွန်တော်ကိုယ်တိုင် ကြုံတွေ့ခဲ့ရတဲ့ အလံတော် ပြောင်းပြန်ဖြစ်မှုတွေကို ပြန်လည်သတိရနေမိပါတယ်။

       အခု ရှမ်းပြည်နယ်ရဲ့ အလံတော်ဟာ အခု ပြည်ထောင်စု မြန်မာနိုင်ငံတော် အလံလိုဘဲ အပေါ်ကနေအောက်ကို အ၀ါ အစိမ်း အနီ အလျားလိုက်အညီအမျှ ခြယ်ထားတာပါ။ ကွဲပြားတာကတော့ ရှမ်းပြည်နယ်အလံက အလယ်ခေါင်မှာ အဖြူရောင် "လ" အ၀ိုင်း ဖြစ်ပြီး ပြည်ထောင်စုမြန်မာနိုင်ငံ အလံတော်ကတော့ အလယ်ခေါင်မှာ အဖြူရောင် "ကြယ်" ခပ်ကြီးကြီး တစ်လုံး ဆိုပြီးခြားနားတာဘဲ ရှိပါတယ်။

       အဲဒီ အလယ်ခေါင်မှာ လပြည့်ဝန်းနဲ့ ရှမ်းပြည်နယ်အလံဟာ ၁၉၄၇ ခုနှစ် ပြည်မနဲ့ တောင်တန်း ဒေသတွေ ပြည်ထောင်စု ဖွဲ့စည်းကြဖို့ ဆွေးနွေးပွဲကနေ ပေါ်ပေါက်လာတာ ဖြစ်ပါတယ်။ အဲဒီဆွေးနွေးပွဲတွေမှာ ရှမ်းစော်ဘွားတွေက ပြည်မနဲ့ ပူးတွဲပြီး အင်္ဂလိပ်အစိုးရဆီကနေ လွတ်လပ်ရေးရယူပြီး ပြည်ထောင်စုအဖွဲ့ဝင်အဖြစ် ပူးပေါင်းပါဝင်ဖို့ ဆုံးဖြတ်ခဲ့ကြတယ်။ ပြည်ထောင်စုကြီးကို ပူးပေါင်းထူထောင်ဖို့ ရှမ်းစော်ဘွားတွေ ဆုံးဖြတ်ခဲ့ကြတဲ့နေ့ကတော့ ၁၉၄၇ ခုနှစ် ဖေဖေါ်ဝါရီလ (၇) ရက်နေ့ဖြစ်ပါတယ်။ အဲဒီနေ့ကို ဂုဏ်ပြုတဲ့အနေနဲ့ စော်ဘွားတွေက အဲဒီနေ့ကို "ရှမ်းအမျိုးသားနေ့" ဆိုပြီး သတ်မှတ်ခဲ့ကြတယ်။ အဲဒီနေ့မှာဘဲ ''ရှမ်းအမျိုးသားသီချင်း" နဲ့ "ရှမ်းအမျိုးသားအလံ" ကို သတ်မှတ်ခဲ့ တယ်။ ရှမ်းအမျိုးသားအလံကတော့ ပြောခဲ့သလို အ၀ါ အစိမ်း အနီ ကန့်လန့်ဖြတ်သုံးရောင်ခြယ်မှာ အလယ်ခေါင်က အဖြူရောင် လပြည့်ဝန်းကြီးကို ထည့်သွင်းထားတာပါ။

       ရှမ်း အမျိုးသားအမျိုးသမီးတွေက ရှမ်းအမျိုးသားအလံကို အမြတ်တနိုးရှိကြပါတယ်။ ထားကြပါတယ်။ ရှမ်းအမျိုးသားနေ့ကိုလည်း နှစ်စဉ် တခုတ်တရ ပွဲကြီးတွေ ကျင်းပခဲ့ကြပါတယ်။ ပြည်ထောင်စုကြီး ပေါ်ပေါက်စေခဲ့တဲ့နေ့ ဆိုပြီးတော့ပေါ့။ နောင်အခါကြမှ အကြောင်းအမျိုးမျိုးကြောင့် ရှမ်းအမျိုးသားနေ့ ရှမ်းအမျိုးသားအလံတွေကို ရှမ်းပြည်နယ်နေ့ ၊ ရှမ်းပြည်နယ်အလံ ဆိုပြီး ပြောင်းလဲခဲ့ကြတာပါ။ သိပ်မကြာလှသေးတဲ့ သမိုင်းကြောင်းကလေးတစ်ခုပေါ့ဗျာ။

       နှစ်ကိုတော့ မမှတ်မိတော့ပါဘူး။ ၁၉၇၀ စောစောပိုင်းလောက်ကလို့ ထင်မိတယ်။ အဲဒီတုန်းက ရန်ကုန်မြို့ အောင်ဆန်းဘောလုံးကွင်းမှာ တိုင်းနဲ့ပြည်နယ် ဘောလုံးပြိုင်ပွဲတွေကို နှစ်စဉ်ခြိမ့်ခြိမ့်သဲ ကျင်းပနေတဲ့အချိန်ပေါ့။ လူပျိုပေါက် ကျွန်တော်တို့တွေကလည်း တစ်ပွဲမှ အလွတ်မပေး အားပေးခဲ့ကြ တာပေါ့။ ညနေ ၄-နာရီကစားမယ့်ပွဲကို နေ့လယ် တစ်နာရီလောက် ကွင်းထဲကြိုဝင် နေပူခံစောင့်ကြည့် ခဲ့ရတာပါ။ အဲဒီလို နှစ်စဉ်ထဲက တစ်ခုသော ဖွင့်ပွဲမှာတော့ အသင်းလိုက်တန်းစီ ချီတက်အလေးပြုကြရာမှာ ရှမ်းပြည်နယ်အသင်းရဲ့ ဆိုင်းဘုတ်ကိုင်ပျိုဖြူရှေ့ကနေ လွှင့်ထူလာတဲ့ ရှမ်းပြည်နယ်အလံကြီးဟာ ပြောင်းပြန်စောက်ထိုးကြီး ဖြစ်နေခဲ့ပါတယ်။ အပေါ်အောက် အနီ အစိမ်း အ၀ါ ဖြစ်နေတာပေါ့။ တခြားဘယ်သူမှ မရိပ်မိပေမဲ့ အဲဒီနေ့က တက္ကသိုလ်လာတက်တဲ့ ရှမ်းပြည်နယ်က ကျောင်းသားတွေကလည်း တိုက်တိုက်ဆိုင်ဆိုင် ရှိနေတော့ ၀ိုင်းအော်ကြတာပေါ့။ ဒါပေမဲ့ တန်းစီပြီး ချီတက်လာကြတာမို့ ဘယ်လိုမှ ပြန်မပြင်နိုင်တော့ပါဘူး။ သိသိကြီးနဲ့ ပြီးသည်အထိ ဆက်လျှောက်သွားရပါတယ်။ အဲဒီကိစ္စမှာ အရေးယူမှု ရှိ-မရှိ ကျွန်တော် မသိလိုက်ရပါဘူး။

       ၈၈၈၈ အရေးတော်ပုံမှာ နိုင်ငံတော်အလံတော်ကို ပြောင်းပြန်ထူပြီး ဆန္ဒပြတဲ့လူတွေ အရေးယူ ခံရတယ်လို့တော့ ကြားဖူးတယ်။ ဒါပေမဲ့ ဘယ်လောက်ပြစ်ဒဏ်ပေးခံရတယ် ဆိုတာ မသိခဲ့ပါဘူး။ မှန်-မမှန်ဆိုတာတောင် အတည်ပြုဖို့ မတတ်နိုင်ခဲ့ပါဘူး။

       နောက်တစ်ကြိမ် ကြုံရတာလည်း ရှမ်းပြည်နယ်အလံပဲ ဖြစ်ပါတယ်။ နေရာကတော့ အမျိုးသား ညီလာခံမှာ ဖြစ်ပါတယ်။ ၁၉၉၃ ခုနှစ် အမျိုးသားညီလာခံကို စစ်အစိုးရက ကျင်းပပါတယ်။ ကျွန်တော်တို့လည်း ပါဝင်တက်ရောက်ခဲ့ပါတယ်။ အမျိုးသားညီလာခံ အစုအဖွဲ့ အစည်းအဝေးတွေကိုတော့ ကျိုက္ကဆံကွင်းက အစည်းအဝေးခန်းကလေးတွေမှာ ခွဲပြီးကျင်းပတာပါ။ ပြီးတော့မှ အဲဒီအစုအဖွဲ့ အစည်းအဝေးလေးတွေက စာတမ်းတွေကို စိစစ်ပြီးမှ စုံညီ ညီလာခံမှာ တစ်ခါပြန်ပြီး တင်သွင်းရတာပါ။ အဲဒီစုံညီ ညီလာခံကိုတော့ သမ္မတ အိမ်တော်ဝင်းထဲက ခန်းမမှာ ကျင်းပပါတယ်။ လွှတ်တော် ကျင်းပတဲ့ခန်းမ မဟုတ်ပါဘူး။ မဆလ ပါတီ ညီလာခံတွေ လုပ်လေ့ရှိတဲ့ ခန်းမလို့ ရောက်ခဲ့ဖူးသူတွေ ကတော့ ပြောပြပါတယ်။ အဲဒီ ခန်းမရှေ့မှာ ပြည်နယ်နဲ့တိုင်း အသီးသီးရဲ့ အလံတော်တွေကို တန်းစီပြီး လွှင့်ထူထားပါတယ်။

       တစ်ခုသော စုံညီ ညီလာခံမှာတော့ ကျွန်တော်တို့ SNLD ပါတီ ကိုယ်စားလှယ် တစ်ဦးဖြစ်တဲ့ ဒေါ်မေသန်းလွင်က သူ့အတွက် ဓါတ်ပုံရိုက်ပေးဖို့ ကျွန်တော့်ကို ပြောပါတယ်။ ကင်မရာဆွဲပြီး ခန်းမရှေ့ အလံတိုင်တွေရှေ့တည့်တည့်မှာ သူကရပ်ပါတယ်။ ပြီးတော့ ရှမ်းပြည်နယ်အလံ ပါအောင် ရိုက်ပေးဖို့ ပြောပါတယ်။ ကျွန်တော်လည်း နောက်ဆုတ်ပြီး အလံတော်နောက်ခံနဲ့ ဒေါ်မေသန်းလွင်ပုံကို ရိုက်ပေးလိုက်ပါတယ်။ စိတ်ထဲမှာ တစ်ခုခုတော့မှားနေတယ်လို့ ခံစားမိတာနဲ့ နောက်တစ်ပုံ ထပ်ရိုက်မယ်ပြောပြီး ချိန်လိုက်ပါတယ်။ လားလား အလံက ပြောင်းပြန်ကြီး ဖြစ်နေတာကို တွေ့လိုက်ရပါတယ်။ ရိုက်ဖြစ်အောင်တော့ ရိုက်လိုက်ပါတယ်။ ပြီးတော့မှ ဒေါ်မေသန်းလွင်နားကပ်ပြီး အန်တီ ရှမ်းပြည်နယ်အလံကြီးက စောက်ထိုးကြီးဖြစ်နေတယ်လို့ တိုးတိုးပြောလိုက်တယ်။

       ဒေါ်မေသန်းလွင်လည်း မော့ကြည့်လိုက်ပြီး ပါးစပ်ကို ရွဲ့ ၊ ပခုံးကို တွန့်ပြပါတယ်။ ကျွန်တော်က ဘယ်လိုလုပ်မလဲ လို့မေးတော့ တိုးတိုးတိတ်တိတ် လုပ်ပါ လို့ပြောပါတယ်။ ဟုတ်ပါတယ်။ တစ်စုံတစ်ယောက်ကို ဒုက္ခရောက်စေဖို့ကို ကျွန်တော်တို့ မကြိုက်ပါဘူး။ မဖြစ်စေချင်ပါဘူး။ ဒီသတင်းကတော့ ကျွန်တော်တို့ SNLD ထဲမှာတော့ ပြန့်နှံ့သွားပါပြီ။ လူကြီးတွေကလည်း အကျယ်အကျယ်မဖြစ်ဖို့ ပြောပါတယ်။ အဲဒီအချိန်က မြန်မာ့နိုင်ငံရေးကိစ္စ အပြင် ကျွန်တော်တို့က တန်းတူညီမျှတဲ့ ပြည်ထောင်စုကြီး ဘယ်လိုတည်ဆောက်သင့်တယ်ဆိုတာ တင်ပြနေတဲ့ အချိန်အခါပါ။ စဉ်းစားကြည့်ပေါ့။ အဲဒီ အချက်ကို ထောက်ပြပြီး ဆွေးနွေးမယ်ဆိုရင် ဘယ်လောက် မျက်နှာပျက်စရာတွေ ဖြစ်မလဲ ဆိုတာ။ ဒါပေမဲ့ အားလုံးက အဲဒီလို မလုပ်ချင်ကြပါဘူး။ အဲဒီအပေါ် အမြတ်ထုတ်တာမျိုး မဖြစ်ချင်ကြပါဘူး။ ဒါနဲ့ဘဲ ကျွန်တော်က လူကြီးတွေ ကြွလာမယ့် စင်္ကြန်လမ်းမှာ သွားစောင့်ပါတယ်။ အမျိုးသား ညီလာခံကျင်းပရေး ကော်မရှင်အဖွဲ့ဝင် ဗိုလ်မှူးသန်းထွန်း (ထောက်လှမ်းရေး) ကိုတွေ့တော့ သူကလည်း ကျွန်တော့်မျက်လုံးမြင်တာနဲ့ တစ်ခုခု ဖြစ်မှန်းသိပုံရပါတယ်။ ကျွန်တော့ဆီ တန်းလျှောက်လာပြီး ဘာလဲ လို့မေးပါတယ်။ ကျွန်တော်လည်း အကျိုးအကြောင်းကို တိုးတိုးဘဲ ပြောပြလိုက်ပါတယ်။ သူက ကျေးဇူးပါဘဲ၊ ချက်ချင်းပြင်လိုက်ပါမယ် လို့ ပြောပြီး ထွက်သွားပါတယ်။

       ညီလာခံပြန်စတော့ ပြင်လိုက်တယ် ထင်ပါတယ်။ ညီလာခံ ပြန်နားလို့ သွားကြည့်တော့ အမှန်အကန်ပြန်ဖြစ်နေပါပြီ။ ဒါပေမဲ့ မျက်စိစူးရှလှတဲ့ NLD အဖွဲ့တွေက ဗိုလ်မှူးသန်းထွန်းကို ဘာသွားပြောတာလဲဆိုပြီး အတင်းဝိုင်းမေးနေတာကိုတော့ ကျွန်တော့်မှာ မဖြေလည်း အခက် ၊ ဖြေလည်းအခက် ဖြစ်ခဲ့ရပါတော့တယ်။

စိုင်းညွန့်လွင်
၃၁-အောက်တိုဘာ ၂၀၁၂

No comments:

Post a comment